Прынамсі 43 чалавекі загінулі ў выніку раптоўных паводак у цэнтральным Тэхасе. Сярод ахвяр пятнаццаць дзяцей. Улады баяцца, што колькасць ахвяр можа павялічыцца, бо многія людзі, у тым ліку ўдзельнікі летняга лагера, дагэтуль лічацца зніклымі без вестак.
Трагедыя адбылася пасля моцных ападкаў, якія за некалькі гадзін паднялі ўзровень вады ў рацэ Гвадэлупе амаль да 9 метраў. Вада затапіла зоны адпачынку, зрывала масты і выносіла аўтамабілі. Сярод зніклых 27 дзяўчат, удзельніц летняга лагера Camp Mystic.
Маштабы разбурэнняў велізарныя — цэлыя гарады былі затопленыя, а некаторыя дарогі і масты атрымалі сур'ёзныя пашкоджанні. Губернатар Тэхаса Грэг Эбат папрасіў прэзідэнта Дональда Трампа абвясціць стан стыхійнага бедства, што дазволіла б выдзеліць федэральную дапамогу.
Прэзідэнт ЗША запэўніў, што яго адміністрацыя супрацоўнічае з дзяржаўнымі і мясцовымі ўладамі Тэхаса.
ПР/юл